Me mijëra janë jetët që humben çdo ditë si pasojë e diabetit të pazbuluar në kohë, të pa trajtuar e ndjekur si duhet, shpesh për shkak të mungesës së informimit të personave me diabet, por edhe si pasojë e mungesës së trajnimit të vetë personelit mjekësor që kujdeset për ta. Diabeti sot nuk është  më vetëm « një krizë shëndeti ». Ai po bëhet çdo ditë e më shumë një çështje e pazgjidhur, sidomos për vendet në zhvillim siç është edhe vendi ynë. Nuk mundet asnjë të nxjerrë një përfitim ekonomik, shëndetësor, apo social duke vazhduar ta injorojë këtë pandemi botërore. Për fat të keq, shifrat që përmenden vazhdimisht dhe realiteti që hasim çdo ditë vërteton se po ndodh pikërisht ajo që duhet evituar, injorimi, apo më mirë të themi mosmarrja me seriozitet e situatës dhe e diabetit.

Ndaj kërkojmë që të kemi gjithmonë përkrahjen, ndihmën dhe mirëkuptimin e personave me diabet, personelit mjekësor dhe organeve vendim-marrëse e politikëbërëse në Shqipëri, pasi siç thoshte edhe Nënë Tereza : « E rëndësishme është që  të bëni qoftë edhe gjëra të vogla, por me dashuri të madhe ».